پاکستانی سائنسدان کا کارنامہ، پانی سے پلاسٹک سے مائیکرو ذرات نکالنے کا طریقہ دریافت
نجی ٹی وی جیو نیوز کے مطابق پہلے مائیکرو پلاسٹک کے ذرات کو پانی سے علیحدہ کرنا ممکن نہ تھا اور پانی میں پلاسٹک کے ذرات کی وجہ سے آبی حیات کے ساتھ ساتھ انسانوں کی صحت پر بھی اس کے منفی اثرات مرتب ہو رہے تھے لیکن آسٹریلیا میں زیر تعلیم پاکستانی سائنسدان محمد حارث نے اس مشکل کا حل نکال لیا ہے۔
محمد حارث سے ایک ایسا جادوئی پاؤڈر تیار کیا ہے جو پانی سے مائیکرو پلاسٹک کے ذرات کو کسی مقناطیس کی طرح اپنے اندر جذب کرنے کی صلاحیت رکھتا ہے، پاکستانی سائنسدان کی دریافت کو امریکا سمیت مغربی دنیا میں بڑی کامیابی قرار دیا جا رہا ہے۔
جیو نیوز کے مارننگ شو جیو پاکستان میں گفتگو کرتے ہوئے محمد حارث کا کہنا تھا اس کی مثال آپ اس طرح سے لے لیں کہ ایک کار پارکنگ ہے جس میں مختلف منزلیں ہیں جس کے درمیان میں آپ مختلف پلرز کھڑے کر دیتے ہیں، اسی طرح کا اسٹرکچر ہمارے مٹیریل کا بھی ہے جس کی وجہ سے زیادہ پانی بیچ میں سے گزر سکتا ہے اور زیادہ مائیکرو پلاسٹک کے ذرات اس مقناطیسی پاؤڈر کے ساتھ لگ سکتے ہیں۔
مائیکرو پلاسٹک کے ذرات کو پانی سے علیحدہ کرنے کے لیے استعمال ہونے والے پاؤڈر کے صحت پر منفی اثرات سے متعلق سوال پر محمد حارث نے بتایا کہ یہ زیتون کے تیل کو استعمال کرتے ہوئے بنایا گیا ہے اور اس میں آئرن کے پارٹیکلز بھی استعمال کیے گئے ہیں، یہ ایک قسم کا نقصان نہ پہنچانے والا پاؤڈر ہے، ہم نے اپنی لیبارٹری میں اس کا تجربہ کیا ہے جو بالکل بھی نقصاندہ نہیں ہے۔
محمد حارث کا کہنا تھا ابھی تو ہم نے صرف تجرباتی طور پر یہ ثابت کیا ہے کہ کس طرح سے پانی سے مائیکرو پلاسٹک کے ذرات کو کامیابی کے ساتھ علیحدہ کیا جا سکتا ہے لیکن ہمارا منصوبہ ہے کہ ہم اس چیز کو آگے لیکر چلیں اور انڈسٹریز کے ساتھ مل کر بڑے پیمانے پر کام کریں۔
انہوں نے بتایا کہ جب یہ خبر آسٹریلیا میں بریک ہوئی تو وہاں کے بڑے میڈیا ہاؤس نے ہمارا انٹرویو لیا اور اس تجرے کو دنیا کے 400 سے زائد ڈیجیٹل پلیٹ فارمز پر شائع کیا جا چکا ہے اور اسے مختلف زبانوں میں ترجمہ کر کے بھی شائع کیا گیا ہے۔
محمد حارث نے بتایا کہ اس وقت دنیا میں اس طرح کا جتنا بھی کام ہو رہا ہے وہ بہت ہی کم ہے، جو تھوڑا بہت دستیاب ہے وہ بھی غیر محفوظ اور بہت مہنگا ہے یا مکمل طور پر مائیکرو پلاسٹک کو صاف نہیں کرتا، اس لحاظ سے ہمارا مٹیریل ہر طرح سے بہتر ہے۔
Pakistani Scientist breakthrough
